बदल हवाय असे वाटते आहे - महाराष्ट्र देशा
शेवटच्या चाकावरून
परत खूप साऱ्या दिवसांनी हे लिहायला घेताना, सहज मनात आले कि आपण सगळेच खूप बदल अनुभवतोय, एक्सप्रेस वरून फ्री वे, अटल सेतू , समृद्धी, टनेल्स प्रवासाची सुरवात, मेट्रो, ए सी लोकल्स, वंदे भारत विस्तार पुढे आता महाराष्ट्र दिनी सुरु होणारी मिसिंग लिंक
मागे एका लेखात लिहिले होते कि खंडाळ्याचा घाटातून रात्री अपरात्री मेल ट्रेन वरून काम करताना खूप साऱ्या वाहनाच्या रांगा दिसतात कधी त्यांचे दिवे धावत असतात तर एका ठिकाणी खोळंबलेले असे भोर घाटा सारखे थळ घाटात पण दिसायचे पण आधी एक्सप्रेस वे नंतर समृद्धीने ती वाहतूक एकदम जलद गतीने होताना दिसते
आमच्या काही सहकाऱ्यांनी ह्या वाहतूक वेगा बरोबर सामाजिक जाणिवेचा वेग हि चांगला धरला आहे, पूर्वी एक सातत्य मंडळ होते आमच्या कर्मचाऱ्याचे !
ते आमच्या रेल्वे कुटुंबातील मुलांना मुलींना शैक्षणिक बक्षिसे देत होते पुढे आता आमच्या एम्प्लॉईज क्रेडिट सोसायटी तर्फे रेल्वे कर्मचाऱ्यांच्या गुणी मुली मुलांचा सत्कार आणि रोख बक्षिसे देतात.
पुढे इनर व्हॉइस, रेल मित्र परीस स्पर्श तसेच महाराष्ट्र मंडळ, शिव जयंती मंडळ व पे बॅक टू सोसायटी अश्या संस्था आणि उपक्रम रेल्वे कर्मचारी इतर समाज वर्गासाठी चालवत असतात.
बदल हवाय महाराष्ट्र देशी ..................... असे शीर्षक आणि लेख सुचला त्याचे कारण असे झाले कि
नदीत कपडे धुताना महिलेचा मृत्यू असे वाचनात आले ...................
सहज ह्यातील काही शब्द सर्च इंजिन वर टाकले आणि वाचले तर खुप साऱ्या घटना आणि बातम्या आहेत . खूप वाईट वाटले
मध्यंतरी माझा एक जुना लोकल मोटरमन नातेवाईक सहकाऱ्यांची भेट झाली, त्यांनी दोन एक वर्षा पूवी स्वेच्छा निवृत्ती घेतली, विचारले काय करतोस हल्ली तर म्हणाला समाजात काम करणारे काही क्लब / संस्था आहेत त्यात काम करतो, मग मी त्याला म्हंटले माझ्या मनात एक विषय खूप वादळ करतो आहे तो मी लवकरच लिहिणार असे नक्की वाच.
दख्खन च्या पठारा वरून म्हणजे पुण्या कडून अथवा झालेच तर राजधानी अथवा वंदे भारत जळगाव अथवा शिर्डी वरून झालेच तर रत्नागिरी वरून मुंबई कडे येताना अनेक ठिकाणी नद्या दिसतात त्या नद्यांच्या काठावर दिवसा म्हणजे खास करून दिवस दुपार कडे वळताना अनेक स्त्रिया नदी तीरावर कपडे धुणी दिसताना दिसतात अथवा भांडी घासताना दिसतात.
ओह दुःखाने सांगावेसे वाटते कि खूप घटना अश्या आहेत ह्या बाया बापड्या काही वेळा वाहून जातात तर काही वेळा ह्यात त्यांना प्राण गमवावे लागत आहेत, त्या वेळेस त्यांना वाचणारे जवळ जवळ कुणीच नसते, आता ह्याच भागात जसे परदेशात असतात तसे वेगवान रस्ते होत आहेत, मेट्रो बुलेट ट्रेन नवीन विमानतळ होत आहेत, परदेशात जे लेटेस्ट प्रॉडक्ट आणि सर्व्हिस आहे ती इथे उपलब्ध होत आहेत मग मनात येते परदेशात रेंटल हौसिंग कॉम्प्लेक्स मध्ये कम्युनिटी लाँड्री मशिन्स असतात, त्यावर भाडेकरू सदनिका धारक आपल्या कपड्यांचा लॉट टाकतो धुणे वाळवणे आणि कोरडे होणे हे सगळे ते लाँड्री मशीन करते, बरं, ते मशीन सुंदर लॉक होते आणि सिम कार्ड अथवा मोबाईल अँप द्वारे पेमेंट केले कि सुरु होते.
आता बाया बापड्या धुणी धुताना वाहून जातात, नदीचे पाणी प्रदूषित होते त्या ऐवजी निदान महा मुंबई आणि महा पुण्याच्या जवळ काही सामाजिक संस्था. सोशल स्टेटस वेल्फेअर क्लब तसेच काही श्रीमंत देवस्थाने अथवा उत्सव मंडळे ह्यांनी अश्या काही ठिकाणी नदी काठी कम्युनिटी लाँड्री मशीन बसवण्याची व्यवस्था केली तर बाया बापड्यांचा जीव वाचेल, नदी प्रदूषित होण्याची वाचेल, नारू सारख्या रोगराई ( हल्ली आपल्या कडे नाही असे वाचनात आले, चांगलेच आहे) अथवा तत्सम अनेक व्याधी पासून त्या दूर राहतील तसेच ते मशीन होताना त्या स्त्रियांना साक्षरता वर्ग प्रौढ शिक्षण कुटुंब कल्याण कार्यक्रम तसेच मुलांचा अभ्यास अथवा स्वतः साठी वाचन करू शकतील.
कम्युनिटी वॉशिंग मशिन्स जर लोक प्रतिनिधी निधी, ब्लॉक डेव्हलपमेंट ऑफिसेस अथवा ग्रामस्थ मंडळे ह्यांचा मार्फत बसवता येतील का हे पण पडताळून बघायला हवे अथवा आपल्या प्रगतिशील राज्यात अनेक संस्था अथवा वेल्फेअर / चॅरिटी क्लब अथवा कॉर्पोरेट सोशल रिस्पॉंसबलीटी अंतर्गत कंपन्या कडून मदत घेता येऊ शकेल असे वाटते.नाम मात्र अथवा देखभाल शुल्क हे संस्थांनी आणि उपयोगकर्त्या मंडळीने वाटून भरावे
येणाऱ्या महाराष्ट्र दिनाच्या सर्वाना हार्दिक शुभेच्छा !!!
आंतरराष्ट्रीय कामगार दिनाच्या हार्दिक शुभेच्छा !!!
@रविंद्र गांगल
शेवटच्या चाकावरून
३० एप्रिल २०२६
(पोस्ट चा बहुतेक भाग मी घेतलेल्या / मिळालेल्या माहिती वर आधारित आहेत, एखाद्या विषयाचे समयोचित कौतुक आणि आकलन आवश्यक आहे तसेच आपल्या प्रतिक्रिया, सूचना, कौतुक आणि टीका ह्यातुन आणखीन काही शिकायला मिळेल ह्या अपेक्षेने हा खटाटोप !) (“शेवटच्या चाकावरून” ह्या माझ्या आगामी आत्मचरित्र पर लिखाणाचा एक भाग) (चूकभूल आणि थोडे लेखन स्वातंत्र्य क्षम्य असावे.)
